2012-10-26
თსუ საპატიო დოქტორის წოდების მინიჭება
26 ოქტომბერს, 15.00 საათზე ივ. ჯავახიშვილის სახელობის თბილისის სახელმწიფო უნივერსიტეტში ბრიტანეთის შეფილდ-ჰალამის უნივერსიტეტის პროფესორის მარკ დოელისთვის საპატიო დოქტორის წოდების მინიჭების ცერემონიალი გაიმართება.შეფილდ-ჰალამის უნივერსიტეტის საპატიო პროფესორი მარკ დოელი თბილისის სახელმწიფო უნივერსიტეტთან 2005 წლიდან თანამშრომლობს. ამ წელს თსუ სოციოლოგიისა და სოციალური მუშაობის მიმართულებამ პირველად მოიპოვა ევროკომისიის ტემპუს/ტასისის 3 წლიანი გრანტი ( ”სოციალური მუშაობის განათლების დაფუძნება საქართველოში” - ESWEG). აღნიშნულ პროექტის ფარგლებში თსუ-ს პარტნიორები იყვნენ შეფილდ-ჰალამის უნივერსიტეტი (დიდი ბრიტანეთი) და ლუბლიანის უნივერსიტეტი (სლოვენია). პროექტის აკადემიური ხელმძღვანელი იყო პროფ. მარკ დოელი.
თსუ-სა და შეფილდ-ჰალამის უნივერსიტეტებს შორის დადებული ხელშეკრულების (2010 წ.) თანახმად, თსუ სოციალური მუშაობის მაგისტრატურის სტუდენტს შესაძლებლობა აქვს, თსუ სოციალური მუშაობის მაგისტრის ხარისხის პარალელურად მოიპოვოს შეფილდ-ჰალამის უნივერსიტეტის სოციალური ზრუნვის მაგისტრის ხარისხი.
მარკ დოელის ძალისხმევით დაარსდა ინგლისურენოვანი, საერთაშორისო რეფერირებადი სამეცნიერო ჟურნალი - ”სოციალური მუშაობა და სოციალური პოლიტიკა გარდამავალ პერიოდში”, რომელიც ამ პროფილის და სტატუსის ერთადერთი ჟურნალია საქართველოში სოციალური მეცნიერებების სფეროში.
პროფ. მარკ დოელი არის საქართველოში ახალი დარგის - სოციალური მუშაობის - ფუძემდებელი. სოციალური მუშაკის პროფესია დღეს საქართველოს სახელმწიფოს მიერ შემუშავებული სოციალური პროგრამების ერთ-ერთი საყრდენი ინსტრუმენტია. თსუ საქართველოში ერთადერთი უმაღლესი სასწავლებელია, რომელიც კვალიფიციური სოციალური მუშაკების გამოშვებას უზრუნველყოფს.
მისამართი: ი. ჭავჭავაძის გამზ.1, თსუ პირველი კორპუსი, მელიქიშვილის სახელობის საკონფერენციო დარბაზი, (აუდიტორია #115) « იხ. ყველა ანონსი