„ვკვდები როგორც ქვეყანა"- თარგმანის პრეზენტაცია

დიმიტრის დიმიტრიადისის "ვკვდები როგორც ქვეყანა” მოგვითხრობს ამბავს ეპოქისა, რომელსაც "საშოს შუა საუკუნეები” ეწოდა. ესაა ეპოქა მრავალწლიანი ომებისა, როდესაც საომარ აგონიაში მყოფი ქვეყნის ჯარისკაცები შიშსა და სასოწარკვეთას მისცემიან, როდესაც ხალხს ერთადერთ ხსნად მტრის ჯარის შემოსვლაღა ესახება, როდესაც ეკლესიის ერთადერთ მიზანს აქამდე არსებულთა საპირისპირო, პერვერსიული ღირებულებების დამკვიდრება წარმოადგენს, როდესაც კრიმინალს ოფიციალურად იცავს კანონი, როდესაც კაცს დაუკარგავს ძირითადი – გამრავლების ფუნქცია და შესაბამისად, ქალები წლების განმავლობაში ვეღარ შობენ ბავშვებს. ესაა ამბავი ერის სიკვდილისა, არა იმდენად ფიზიკური, რამდენადაც სულიერი სიკვდილისა. დამარცხებული ქვეყნის მოსახლეობის შეგნებაში ყველა ადამიანური ღირებულების სიკვდილი და თავად ადამიანის ღირებულების სიკვდილი უფრო მეტია, ვიდრე ნებისმიერი სხვა სიკვდილი, თუნდაც იყოს ეს ქვეყნის მსოფლიო გეოპოლიტიკური რუკიდან გაქრობა. ამ საყოველთაო და ქაოტურ სიკვდილში კი ერთეული, მომაკვდავი ადამიანების ხმა არავის ესმის, თუმცაღა მას სიტყვა-სიტყვით თანხვდება ქალად ქცეული ქვეყნის გოდება, ქვეყნისა, რომელსაც აღარ ძალუძს დასაბამი მისცეს ახალ სიცოცხლეს, ქვეყნისა რომლის სული და სხეული თანადროულ სიკვდილს მოუცავს. – ესაა მოკლე მონახაზი დიმიტრიადისის რომანისა "ვკვდები როგორც ქვეყანა”, რომელიც  პირველად 1979 წელს გამოქვეყნდა, ანუ მაშინ, როდესაც თანამედროვე ბერძნული სახელმწიფოს ჩამოყალიბება სულ ახალი დაწყებული იყო და დიქტატორულ რეჟიმს თავდაღწეული ერის სიკვდილ-სიცოცხლის საკითხი ჯერ კიდევ დღის წესრიგში იდგა. ნაწარმოების  ლიტერატურული ღირებულების მაჩვენებლია ისიც, რომ რომანი დღემდე ერთ-ერთ ყველაზე უფრო წაკითხვად და პოპულარულ თანამედროვე ბერძნულ ტექსტად წარმოგვიდგება, მის საფუძველზე შექმნილი სპექტაკლები კი ბოლო 20 წლის განმავლობაში დიდი წარმატებთა და გამოხმაურებით იდგმება სხვადასხვა ქვეყნის ცნობილ თეატრალურ სცენებზე.