თსუ-მ და თავდაცვის სამინისტრომ სამხედრო-ტექნიკურ ტერმინთა ელექტრონული ლექსიკონი წარმოადგინეს

ივანე ჯავახიშვილის სახელობის თბილისის სახელმწიფო უნივერსიტეტში გაიმართა შეხვედრა, რომელზეც საუბარი შეეხო ქართულ ენაზე დარგობრივი ტერმინოლოგიის განვითარებას საქართველოში. ღონისძიებას თსუ რექტორის მოვალეობის შემსრულებელი დარეჯან თვალთვაძე, საქართველოს თავდაცვის, სხვა სამინისტროებისა და სახელმწიფო უწყებების წარმომადგენლები, უნივერსიტეტის პროფესორები, სტუდენტები, მოწვეული სტუმრები დაესწრნენ. თსუ არნოლდ ჩიქობავას სახელობის ენათმეცნიერების ინსტიტუტის თანამშრომლებმა სამხედრო  ტერმინთა ლექსიკონი შეადგინეს; შეისწავლეს ინგლისურენოვანი და რუსულენოვანი სამხედრო ტერმინები და შეიმუშავეს მათი ქართული შესატყვისები; სასაქონლო მარაგების სამხედრო-ტექნიკურ ტერმინთა ლექსიკონი თსუ-სა და საქართველოს თავდაცვის სამინისტროს შორის გაფორმებული მემორანდუმის საფუძველზე შეიქმნა.
 
თსუ რექტორის მოვალეობის შემსრულებლის დარეჯან თვალთვაძის განცხადებით, სამხედრო ტექნიკური ლექსიკონის პრეზენტაცია, უნივერსიტეტისა და თავდაცვის სამინისტროს მჭიდრო თანამშრომლობის  საუკეთესო მაგალითია: „ეს ლექსიკონი საინტერესო  მხოლოდ მეცნიერებისთვის ან თავდაცვის სამინისტროსთვის არ არის.  ლექსიკონი ფართო მოხმარებისაა, ზოგადად სასარგებლოა ქვეყნისთვის, ენისთვის. ამ თვალსაზრისით, ჩვენ გარკვეული ვაკუუმი ბოლო წლებში ნამდვილად გვქონდა. ლექსიკონი კი ძალიან კარგი მაგალითია იმისა, თუ როგორ შეიძლება ეს ვაკუუმი შევავსოთ. იმედი მაქვს, დღევანდელი პრეზენტაცია კიდევ ბევრი სხვა ამ ტიპის ლექსიკონის შექმნის წინაპირობა იქნება.“

„სამხედრო ტერმინილოგიის შემუშავება თითქმის დასრულებულია. როგორც პროექტის მსვლელობის დროს გახდა ცნობილი, აქამდე არ არსებობდა ერთიანი გამტკიცებული სტანდარტულ ტერმინთა ნორმატიული ბაზა. ენათმეცნიერების ინსტიტუტთან ერთობლივად ვმუშაობთ ერთიანი ტერმინოლოგიის ნორმატიული ბაზაზე, რასთანაც შესაბამისობაში იქნება თავდაცვის სამინისტროს სამხედრო ტერმინთა ტექნოლოგიური ლექსიკონი. მუშაობის დასრულების შემდეგ შეგვეძლება უკვე, როგორც თავდაცვის სამინისტროში, ასევე კერძო სტრუქტურებში ამ ლექსიკონის გამოყენება,“- აღნიშნა საქართველოს თავდაცვის სამინისტროს საინფორმაციო ტექნოლოგიების დეპარტამენტის უფროსმა ირაკლი უჯმაჯურიძემ.

„სამეცნიერო ტერმინოლოგიაზე მუშაობა, ზოგადად ძალიან მნიშვნელოვანია ქვეყნისათვის. სასიხარულოა რომ თავდაცვის სამინისტროსა და არნოლდ ჩიქობავას სახელობის ენათმეცნიერების ინსტიტუტის თანამშრომლობა ნაყოფიერი გამოდგა. შეიძლება ითქვას, ეს პირველი ნაბიჯებია, სამხედრო ტერმინოლოგიის გარკვეული მიმართულების დამუშავების. თუმცა ჩვენი საბოლოო მიზანია, სამხედრო ტერმინოლოგია მთლიანობაში დამუშავდეს,“- განაცხადა ენათმეცნიერების ინსტიტუტის დირექტორის მოადგილემ ვაჟა შენგელიამ.

ქართული ენის უახლესი აქტუალური პრობლემები უშუალოდაა დაკავშირებული დარგობრივი ტერმინოლოგიის განვითარების ფაქტობრივ შეწყვეტასთან საქართველოში. ტერმინოლოგიური პოლიტიკის მოშლის შედეგად მივიღეთ ტერმინოლოგიური სიჭრელე, რომელიც თანდათან ამძიმებს და საურთიერთოდ მოუხერხებელს ხდის  ქართულ სამეცნიერო, ოფიციალურ-საქმიანსა თუ სასაუბრო ენას. ბოლო ხანს საზოგადოებაში არასწორად გამოიკვეთა აზრი, თითქოს ქართული ენის შერყვნას უმეტესწილად მასმედიის უპასუხისმგებლობა იწვევს. ხაზგასმით უნდა ითქვას, რომ ეს საერთო პრობლემაა, რომელსაც ქართველი საზოგადოების ერთობლივი ძალისხმევა სჭირდება.

ტერმინოლოგიურ სირთულეთა დაძლევის საყურადღებო მცდელობაა საქართველოს თავდაცვის სამინისტროს მიერ წამოწყებული პროექტი, რომელშიც ჩართულია  თბილისის სახელმწიფო უნივერსიტეტის არნ. ჩიქობავას სახელობის ენათმეცნიერების ინსტიტუტი. პროექტის საბოლოო მიზანია შეიქმნას ქართული სამხედრო ნორმატიული ტერმინოლოგიის ელექტრონული ბაზა. საზოგადოდ კი ეს  თანამშრომლობა ერთგვარი სანიმუშო პრეცედენტი შეიძლება იყოს ახალი მოთხოვნების შესაბამისი აკადემიური ტერმინოლოგიური ლექსიკონებისა და ელექტრონული ბაზების მოსამზადებლად.