თსუ სოციალურ და პოლიტიკურ მეცნიერებათა ფაკულტეტის ორგანიზებითა და პოლიტიკის მეცნიერების დეპარტამენტის ინიციატივით, კასპის რაიონის სოფელ ხოვლეში, ივანე ჯავახიშვილის სახლ-მუზეუმში სამეცნიერო კონფერენცია „ივანე ჯავახიშვილი და საქართველოს დემოკრატიული რესპუბლიკა“ ჩატარდა.
კონფერენციას უნივერსიტეტის პროფესორები, დოქტორანტები, სახლ-მუზეუმის თანამშრომლები, კასპის მუზეუმების გაერთიანების ხელმძღვანელი და ხოვლის საჯარო სკოლის მოსწავლეები დაესწრნენ.
„საქართველოს დემოკრატიული რესპუბლიკის პერიოდი ივანე ჯავახიშვილის საქმიანობისთვის ერთ-ერთი ყველაზე ნაყოფიერი იყო. ის არამარტო მეცნიერულ კვლევა-ძიებას ეწეოდა, არამედ პრაქტიკულზეც, სახელმწიფოებრივი მშენებლობის საკითხებზეც იყო ორიენტირებული. ამ მხრივ, ივანე ჯავახიშვილის ღვაწლი, ფაქტობრივად, შეუსწავლელია, რაც გასაგებიცაა; საბჭოთა პერიოდში მისი სრული იგნორირება ხდებოდა. პოსტ-საბჭოთა პერიოდში უკვე არის შესაძლებელი მისი მოღვაწეობის ყოველმხრივი შესწავლა.“- განაცხადა ივანე ჯავახიშვილის სახელობის თბილისის სახელმწიფო უნივერსიტეტის პროფესორმა
მალხაზ მაცაბერიძემ.
კონფერენციაზე წარმოდგენილი იყო მოხსენებები, რომელიც ივანე ჯავახიშვილის მოღვაწეობის სხვადასხვა ასპექტს ეხებოდა.
„ივანე ჯავახიშვილი იყო ერთ-ერთი იმ პიროვნებათაგან, რომელმაც ძალიან დიდი როლი ითამაშა ქართული უნივერსიტეტის დაარსებაში. ამასთან ერთად, საქართველოს დამოუკიდებლობის 25 წლისთავი ახლოვდება და უნივერსიტეტში სხვადასხვა გარკვეული ღონისძიებები ტარდება. ეს კონფერენციაც ერთ-ერთი ამ ღონისძიებათა ციკლიდანაა. აქვე მინდა აღვნიშნო მუზეუმის მდგომარეობასთან დაკავშირებით არსებული პრობლემები. ჩემი აზრით, კარგი იქნება, თუ უფრო მეტად დაინტერესდებიან შესაბამისი ორგანოები და მეტ ყურადღებას გამოიჩენენ მუზეუმის მიმართ“ - აღნიშნა თსუ პოლიტიკის მეცნიერებათა დოქტორმა
ლადო ნაფეტვარიძემ.
კონფერენციაზე გაიმართა ბროშურის „ივანე ჯავახიშვილის ორი ლექცია საქართველოს სამხრეთი საზღვრის შესახებ (1918 წლის 18 და 22 დეკემბერი)“ პრეზენტაცია.
